Piemont-Reise vom 29. 9. - 6. 10. 2001
  
Vom Piemont möcht' ich Euch singe,
und s'Schwyzer-Örgeli söll klinge.
Schöni Täg - e tolli Reis -
Hei mer erläbt, e jede weiss.
Am 29igste September,
so stoht's im StV-er Kalender,
istige - Lette - Gartestross,
im Bus hett's Platz, dä isch so gross.
        
Bald fahre mer durchs Alpe-Tor,
e paar hei g'jasset churz devor.
In Aosta hei mer g'spiese,
der Zabli zahlt's, es isch bewiese.
       
Am Obe sin mer in Turin,
do isch zerscht fascht der Wurm no drin.
Doch nach der Irrfahrt quer durch d'Stadt,
Turin bei Nacht, das war so glatt.
     
Am 2. Tag het zelebriert -,
der Keenig d'Mess ganz ungeniert.
Im Kinderheim, s'heisst Cottolengo,
hend d'Auge au so viel becho!
     
Am drei z'Mittag, Turin ade,
die Stadt händ alli jetze gseh.
Zum Hotel gohts in Sommariva,
Roero Park, bald sy mer da.
     
D'Zimmer, die sind bald beleit -,
a d'Hotelbar het eine gseit.
Am Obe sy mer in La Morra,
dört hei mer so ne Ussicht g'ha.
        
Der Vino het der Wy gustiert,
au mer händ dä Saft probiert.
Und nach dem feine, guete Esse,
hei mer d'Heimfahrt fascht vergässe.
          
Am 3. Tag do git's viel z'gseh, -
Cherasco, Cavour und no meh!
Bim Gigi Rosso, Wy vom Cheller,
Fleisch und Chäs uf viele Teller.
         
Berbera het so mänge poschtet,
der Grappa het au wenig kostet.
S'Heidy rüeft im liebe Maa:
"Gäu, mer müesse Grappa ha!"
          
Am Wandertag, oh je mi nee,
hätsch d'Moro-Gruppe sölle g'seh!-
Guarene kennt sie - s'Gertrud seit's.
Zur Siegesfyr goht's no in d'Beiz.
          
Im Spiel-Park sy mer gmüetlich g'sässe,
händ Schinke, Käs und Frücht no gässe,
denn trunke Piemonter Wy -,
fröhlich sin sie alli gsy.
          
Es witers Schlemmermohl am Obe -,
bim Signor Forno muess ich lobe.
Der Manko fahrt eus siche hei,
trotz Sandale a de Bei!
         
Am 5. Tag -, Provinzhauptstadt,
Asti heisst sie, sisch doch glatt.
Do  trinksch es Läbe land dä Wy -,
und jetzt bisch in der Stadt no gsy.
     
Am Mittag git's e Fahrt uf's Land -,
d'Ruth Droeser git der Schwöster d'Hand.
Sie zeigt eus s'Huus - git Wy zum Trinke,
au Brötli und no  feine Schinke.
       
Dr Max sinkt dört bim Swimming-Pool -,
ganz gmüetlich in e Liegestuhl.
Doch plötzlich kracht's, es git e Knall -,
die Röhrli breche überall!
        
Am Obe nomol Apéro -,
Plenis Coloribus sowieso!
Studente-Lieder möcht me singe -,
mit volle Büch cha das nit klinge.
        
Drum tuet eus s'Heidy unterhalte -,
als Muslim-Frau der Schal lo walte.
Der Ciba spielt no am Klavier -,
den rüeft er: "Bringet no nes Bier!"
       
Der Torro het sich denn erhobe:
"Dä Gsang chan ich jetzt nümme lobe.
Ihr alli müesst im neue Johr -,
an Stamm go üebe, wie ne Chor."
       
Am 6. Tag goht's nach Cuneo -,
dort müesse mir der Car verloh.
Die einte luege s'Stedtli a -,
die andere wänd es Jässli ha.
      
I-stiege heisst's, in d'Tendo-Bahn -,
Kurve fahre - s'isch e Wahn.
Die erschti Klass chasch glatt vergässe.
Derfür darfsch s'Luch-Paketli ässe.
       
En Tunnel do - und dört en Rank -,
so wärde eusri Fraue schlank. 
Zwe Stund schüttle, rüttle, fahre -,
so chasch Dir glatt e Schwümmstund spare.
          
In Bordighera, Hauptbahnhof,
de Schüttelbecher si mer los.
Z'Fuess goht's zum Hotel, s'sch bekannt,
Villa Elisa wird's genannt.
      
D'Zimmer, die sin schnell bezoge -,
der Ehrlich wohnt natürlich obe.
Unte gseht me das Piscine -,
obe Meersicht weit, weit hin.
      
Am Obe Fahrt in Restaurant -,
die Beiz am Meer isch sehr bekannt.
En Umweg hei mer müesse neh -,
defür hesch tuusig Liechter gseh.
        
D'Kellner hei an Tisch eus g'wiese,
denn hei mer wieder köstlich g'spiese.
Serviert wird schnell - und immer schneller,
sie nämme eus eweg fascht Teller!
        
Am 7. Tag goht's denn i d'Berge.
Die Dörfer sind so chli wie Zwerge.
D'Strosse kurverich und schmal,
und für e Manko fascht e Qual.
         
Vo Perinaldo här sind's cho,
ei Gruppe mit em Hund doch no.
Nach San Martino - Kurve g'fahre,
sind die Andere mit em Chare.
      
Au do hei mer im Landgast-Saal,
ligurisch g'ässe, erschti Wahl.
Und Wy vom Land hesch chönne trinke,
denn wieder Abschied näh und winke.
        
Galadiner - denn am Obe,
d'Reiseleitig muess ich lobe!
So g'müetlich mit de Dame ässe -
das Hotel tüen mer nit vergässe.
          
D'Farbe hei mer nomol treit -,
denn het dr Zabli kurz no gseit:
"Am Samstig packe - denn zum Bus."
Am nüni prompt sind d'Koffere duss.
    
Zerscht fahre mer em Meer entlang,
d'Ussicht herrlich - denn zum Hang.
Mailand, Como - dra verby -,
im Stau sy mer den au no g'sy.
         
In Bellinzona - letzter Halt!
Schnell öppis ässe - warm oder kalt.
Denn dure Gotthard nach Allschwil,
dört git's nomol uf d'Teller viel.
    
Die tolli Reis isch jetzt verby -,
mer alli sin recht glücklich g'sy.
Der Reiseleitig - viele Dank!
Das wär's g'sy vo der Schnitzelbank!